DIRETÓR EZEKUTIVU HALA’O ABERTURA BA TESTE ESKRITA

FUTURU FUNSIONÁRIU ADN, I.P

Loron-segunda, 16 Maiu 2022: Diretór Ezekutivu ADN, IP Eng. Mariano Renato Monteiro da Cruz hala’o abertura teste eskrita ba konkorente futuru funsionáriu ADN, I.P na’in-197 ne’ebé’akompaña husi Koordenador Unidade Gestaun Administrativa Sr. Nelson Soares Pinto, Assessor Recursos Humanos Sr. Tomas Magno do Carmo, Assessor Ponte Estrada Sr. Santoso nomós ekipa tékniku sira iha salaun Auditório Kampus FECT Hera.

Iha biban ne’e Diretór Ezekutivu husu ba futuru funisionáriu ne’ebé tuir teste eskrita hafoin ba hirak ne’ebé sei pasa ba teste oral/entrevista katak atu tuir optidaun ka kbit ida-idak nian nune’e bele servi ho onestidade no integridade iha hanoin ne’ebé kritiku no inovativu hodi produ rezultadu serbisu di'ak wainhira tama iha ADN, I.P.

‘’Ha’u buka ema ne’ebé onestu tanba matenek ne’e relativu, ita bele hanorin malu maibé kuandu la onestu ne’e probelama uitoan ba dezenvolvimentu Timor-Leste. Ha’u mós buka ema ne’ebé iha integridade di’ak para bele iha hanoin ne’ebé krítiku, kriativu no inovativu atu bele halo buat foun ruma iha instituisaun ne’e’’ haktuir DE iha abertura.

Diretór Ezekutivu mós realsa tan katak ADN, I.P hanesan instituisaun ida ne’ebé iha papel importante ba dezenvolvimentu infra-estrutura iha Timor-Leste ho ninia knar prinsipál sira mak halo avaliasaun previa no sertifika ba projetu kapitál dezenvolvimentu, halo avaliasaun previa no sertifika ba projetu sira kategoria Bens de Servico no Transferénsia Públika ne’ebé relasaun ho projetu fíziku ho montante boot liu $50.000 nomós elabora Estandarizasaun Tékniku ne’ebé relasiona ho dezenvolvimentu infraestrutura iha Timor-Leste, tanba ne’e konkorente sira tenki domina ou hatene matéria ne’ebé ADN aplika hodi halo serbisu ho di’ak ba futuru.

Husi konkorente ne’ebé tuir teste eskrita na’in-58 husi Eng. Ponte Estrada, na’in-60 husi Eng. Edifício, Administrasaun no Finansa na’in-39 no Recursos Humanos na’in 21, enkuantu ICT na’in-4.