Loron-tersa, 15 Fevereiru 2022: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz ho nia Adjuntu Eng. Januario M. Guterres hamutuk ho tékniku sira hala’o enkontru ho Sekretáriu Jerál komisaun organizadora ba serimonia 20 de maiu iha MAE hodi diskute kona-ba komisaun sira nia preparasaun.

Sorumutu ne’ebé hala’o iha salaun enkontru MAE, Xefe Departamentu Edifikasaun, agua no Saneamentu Arq. Francisco Xavier de Deus Jeronimo halo aprezentasaun layout dezeñu ba ekipa sira kona-ba kondisaun atuál ba fatin ne’ebé identifika atu realiza serimónia tomada de pose ba prezidente eleitu 2022 no selebrasaun 20 de Maiu tinan ne’e nian.

Nune’e, tuir observasaun tékniku sira nian, fasilidade hirak ne’ebé presiza atu hadi’a mak hanesan bandeira nia riin, área uma adat, fatin ba seguransa sosiál no pesoal saúde nian, postu sniper, hariis fatin públiku inklui mós estasionamentu no estrada iha área Tasi-tolu nian ne’ebé kondisaun aat hela.

Alende ne’e Adjuntu Eng, Januario Maia Guterres mós halo aprezentasaun ba estimasaun kustu provizóriu ba ekipamentu fasilidade sira ne’ebé atu kompleta hanesan konstrusaun tenda, aluga kadeira, sasan uza ba dekorasaun sound system, inklui mós instalasaun ba ekipamentus hotu ne’ebé nesesáriu iha eventu refere.

Tanba ne’e. Diretór Ezekutivu ADN mós sujere kedan ba komisaun atu prapara seguransa di’ak hodi asegura sasan sira durante prosesu preparasaun, realiza eventu to’o sobu tenda, atu nune’e bele asegura nafatin ekipamentus sira labele hetan estragus.