ENJEÑEIRU ADN. IP PARTISIPA SERIMÓNIA INAUGURASAUN ARMAJEN SAMES REJIONÁL MALIANA

Loron-kinta, 28 Janeiru 2022: Ajénsia Dezenvolvimentu Nasionál, Institutu Públiku (ADN, IP) liu husi Xefe Departamentu Edifikasaun, Água no Saneamentu Arq. Francisco Xavier de D. Hamutuk ho tékniku sira partisipa serimonia inaugurasaun armajen SAMES rejionál de Maliana.

Iha serimonia ne’e, Arq. Francisco Xavier de Deus Jeronimo reprezenta Diretór Ezekutivu, ADN. IP hodi halo asinatura nomós entrega dokumentu armajens SAMES rejionál Malilana ba S.E Ministra Saúde. Hafoin entrega dokumentus hirak ne’e reprezentante Diretór Ezekutivu mós hato’o diskursu badak kona-ba prosesu konstrusaun edifísiu refere.

Reprezentante ne’e esplika prosesu hahú kontrusaun ne’e iha tinan 2019 no lolos finaliza iha tinan 2020, maibé tanba situasaun pandemia covid-19 nune’e difikulta atividade tomak no foin finaliza iha fin do ano 2021. Objetivu husi konstrui armajen SAMES Rejionál Maliana ne’e atu bele asegura distribuisaun aimoruk husi nasionál ba munisípiu, nune’e bele fasilita lalais liu tan atendimentu saúde ba komunidade sira iha munisípiu Bobonaro.

Reprezentante Diretór Ezekutivu ne’e mós hato’o nia agradesimentu ba kooperasaun di’ak entre SAMES ho nia ekipa tomak tanba ho kolaborasaun ADN. IP nomós autoridade lokál sira hotu nia servisu hamutuk bele finaliza konstrusaun ida ne’e ho susesu. Enkuantu obra ne’e finansia husi fundu Kapital Dezenvolvimentu MPO/ADN. IP ho montante $. 220.190.97 no responsabiliza husi kompañia Sembuhan Unipessoal Lda.

Mídia ADN