ADN, I.P LANSA SISTEMA ONLINE PROJECT MANAGEMENT INFORMATION SYSTEM

Díli 8 Novembru 2021: Ajensia Dezenvolvimentu Nasionál Institutu Públiku (ADN,IP) ne’ebé tutela ba Ministériu Planu Ordenamentu (MPO) hala’o lansamentu ba sistema Project Management Information System (PMIS) iha sala reuniaun MPO/ADN.

Iha sesaun abertura ba lansamentu, Diretór Ezekutivu ADN, I.P Eng. Mariano Renato Monteiro da Cruz, introduz kona-ba PMIS ne'ebé henesan sitema online ida atu ADN bele utiliza hodi kontrola servisu monitorizasaun, inspesaun nomós verifikasaun dokumentu sira ba projetu infra-estrutura tomak ADN tantu iha nível nasionál nomós lokál.

"Sistema ne’e hanesan meius ida atu transforma servisu manuál ba servisu eletróniku, nune'e bele fasilita liután tékniku sira nia servisu ho sistemátiku no asegura dadus istóriku kada projetu hodi kontrola no garante transparánsia informasaun ba liñas ministeriais, instituisaun públiku nomós entidade hotu" dehan Diretor Azekutivu.

Iha biban ne'e mós, S.E Vise-Primeiru Ministru no Ministru Planu no Ordenamentu, Eng, José Maria dos Reis apresia ba kompañia timoroan, KINOS nia kontribuisaun kria ona sistema ida ne’ebé bele ajuda instituisaun estadu no públiku atu akompaña dezenvolvimentu infra-estrutura iha territóiu nasionál. Nune’e , apela mós ba (ADN, I.P) hadi'a liután kinerjia servisu hodi bele fó benifísiu ba moris di'ak povu nian liu husi infra-estrutura iha Timor laran tomak ho kualidade no sustentabilidade ba futuru.

Enkuantu, Prezidente Komisaun E, Parlamentu Nasionál, Abel Pires kongratula ba Diretór Ezekutivu ADN, I.P ho ekipa tomak inklui kompañia Kinos ne’ebé iha inisiativa di'ak hodi kria instrumentu ida ne’e, atu nune'e bele hetan nafatin konfiansa husi públiku no mós parseiru sira kona-ba servisu ADN nian.

Deputadu ne'e mós husu ekipa ADN nafatin halo servisu di'ak ba oin hodi servi nasaun no povu liu husi knar ne'ebé iha atu nune'e Parlamentu Nasionál nafatin iha konfiansa hodi hetan dadus ne'ebé bele apoiu sira nia servisu hanesan orgaun fiskalizadór.

Hola pate iha serimónia ne’e, VPM-MPO, Prezidente Komisaun E Parlamentu Nasionál, Vise-Ministru Obras Públika, Prezidente CCI, Adjuntu Komisáriu CAC, no Diretores jerais, ekipa kompañia Kinos, funsionáriu ADN tomak, no media nasionál sira.

Mídia ADN