DIRETÓR EZEKUTIVU ADN PROMOVE SISTEMA PMIS IHA SELEBRASAUN LORON ‘’GEOGRAPHIC INFORMATION SYSTEM’’

Loron-kinta, 18 Novembru 2021: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz akompaña husi sekretaria partisipa serimónia selebrasaun loron Sistema Informasaun Geografia (GIS silga Inglés), iha salaun Mauhoka, Surikmas, Díli.

Serimónia ne’e ho tema ´´Importánsia Utilizasaun Sitema Informasaun Jeográfika atu Apoiu Dezenvolvimentu Integradu no Sustentável iha Timor-Leste´´. Nune’e GIS hanesan sistema ida ne’ebé organizasaun governamentál, não governamentál, setór públiku no privadu inklui organizasaun internasionál sira ne´ebé hala´o knar iha Timor-Leste bele utiliza hodi halibur no fó sai dadus ne’ebé integradu atu garante padraun ida de´it bazeia ba mapa jeografia iha Timor-Leste.

Enkuantu, Diretór Ezekutivu halo mós aprezenta ba sistema GIS nian relasiona ho servisu ADN liu-liu promove kona-ba sistema online Project Management Information System (PMIS) ne´ebé daudaun Institutu refere kria no utiliza hodi fó informasaun kona-ba dadus istóriku ba fatin projetu sira, projetu Overlapping nomós bele fasilita Governante sira foti desizaun.

Diretór Ezekutivu konklui katak relasiona ho servisu ADN nian ba sistema PMIS ne’e mak atu bele vizualiza informasaun iha mapa, kontrola dadus liu husi verifikasaun no inspesaun ADN, IP ho diak, no promove tranparánsia dadus ba entidades hotu kona-ba projetu infra-estrutura sira ne´ebé ADN halo kontrolu iha territóriu tomak.

Entretantu serimónia ne’e organiza husi Ministériu Planu Ordenamentu, liu husi Diresaun Nasionál Dadus Jeografia, no hetan partisipa másimu husi Vise-Ministru no Ministru Planu Ordementu, Eng. José Maria dos Reis, Vise Ministru Agrikultura no Peska Abílio Xavier de Araújo, Prezidente Komisaun E Parlamentu Nasionál Deputadu Abel Pires da Silva, Diretór Jerál no Nasionál sira, Estudante Universidade públiku no privadu, média nomós instituisaun relevantes sira seluk .

Mídia ADN