Baucau-28 Novembru 2021: Diretór Ezekutivu Ajénsia Dezenvolvimentu Nasionál, Institutu Públiku (ADN,IP) Eng. Mariano Renato Monteiro da Cruz akompaña husi Adjuntu Diretór Januario M. Guterres hamutuk ho koordenadór unidade sira nomós ekipa tékniku ADN nian promove materiál tékniku no atividade reál instituisaun nian liu husi expozisaun iha ámbitu selebrasaun loron (28 Novembru 1975 - 28 Novembru 2021) proklamasaun independénsia Repúblika Demokrátika Timor-Leste (RDTL) ba dala-46 ho tema nasionál ´´A UNIÃO E A LUTA CONJUNTA, PARA A VITÓRIA DE TODOS´´ ne’ebé hala'o iha Aldeia Darsula, Suku Gariuai, Postu Administrativu Baucau Vila, Munisípiu Baucau.

Expozisaun ne’e hala'o durante loron tolu (hahú husi 26 to´o 28 Novembru) ADN promove produtu konstrusaun sira, hanesan: amostra Laboratóriu, Eletrisidade, nomós livru Estandarizasaun Presu Unitariu (TL-SUP), Estandarizasaun Padraun ba Medisaun (TL-SMM), Mapa Quary no Distánsia inklui mós imajén kona-ba asaun reál ba tékniku sira nia servisu iha terrenu. Alende ne’e, kontinua sosializa sistema online hirak ne’ebé eziste iha ADN hanesan PMIS, LMS no website ADN nian.

Observasaun jerál iha stand expozisaun ADN nian durante loron tolu ne´e hetan vizitante kuaze atus tolu resin ne´ebé maioria estudante sira ho entusiazmu maka´as hodi buka hatene lala´ok servisu ADN nian.

Durante estadia iha Baucau, Diretór Ezekutivu no ekipa mós partisipa iha serimónia hasa´e bandeira nasionál ba komemorasaun loron proklamasaun independénsia RDTL ne’ebé prezide husi S.E Prezidente Repúblika Francisco Guterres “Lu-Olo”.

Serimónia ne’e mós hetan partisipasaun husi Orgaun Soberania haat, F-FDTL, PNTL, Korpu Diplomátiku, Eis Tutulares, Veteranus, instituisaun estadu nian balun, komunidade, media no seluktan.

Mídia ADN