Manatuto, 12 Outubru 2021.

Diretór Ezekutivu Ajénsia Dezenvolvimentu Nasionál, Institutu Públiku (ADN,IP) Eng. Mariano Renato M. da Cruz akompaña husi koordenadora Unidade Kontrolu no Validasaun Kualidade ho nia Tékniku Munisípiu hala’o audiénsia ho Administradór Munisípiu Manatuto hodi ko’alia kona-ba koordenasaun servisu iha nível tékniku ba projetu konstrusaun sira iha Munisípiu em relasaun ba projetu sira ne’ebé daudaun ne’e pendente hela no liu ona data kontratu.

Objetivu sorumutu ho Administradór Munisípiu Manatuto ne’e, oinsa estabelese koordenasaun servisu ne’ebé di’ak hodi hadi´a efetivamente sistema komunikasaun iha nível tékniku hamutuk ho autoridade sira, nune’e mós iha kompromisu atu bele fornese dadus no informasaun ba malu kona-ba projetu konstrusaun foun sira, ne´ebé la´o hela. Nune´e, sira mós kompartilla opiniaun ba malu kona-ba transparánsia públiku ba projetu sira husi Fundu Infra-estrutura hanesan: Programa Dezenvolvimentu integradu Munisipál (PDIM) no mós projetu Asian Development Bank (ADB) nian. 

Aleinde ko’alia kona-ba hametin liña koordenasaun, Diretór Ezekutivu ADN mós husu Autoridade Munisípiu atu hamutuk ho Tékniku ADN sira iha munisípiu hodi tau matan ka kontrola hamutuk projetu sira ne’ebé implementa husi kompañia no nain ba projetu sira iha terrenu nune’e bele garante di’ak liu tan nia kualidade. 

Administradór Munisípiu hafoin hala’o enkontru ho Diretór Ezekutivu ADN, IP entuziasmu no konkoorda tebes hodi estabelese relasaun servisu di’ak ho ADN, IP, nune’e bele apoiu malu ba aselera servisu projetu konstrusaun sira iha munisípiu.

Mídia ADN