Dili, 06 Agutu 2021

Diretór Ezekutivu Ajénsia Dezenvolvimentu Nasionál, Institutu Públiku (ADN,IP) Eng. Mariano R. M. da Cruz akompaña husi Koordenadora Unidade Avaliasaun Projetu Eng. Melenia da C. Barros no Koordenadora Unidade Kontrolu Validasaun Kualidade Eng. Emerenciana da Costa M. Freitas ho nia Tékniku no Téknika Base de Dadus Eng. Susana S. D. R. Amaral hala’o audiénsia ho Autoridade Munisipál Ainaro Sr. Leovogildo A. Pereira hodi ko’alia kona-ba koordenasaun servisu hamutuk iha nível tékniku iha sala reuniaun DE ADN Bedik-Hun Fatuhada Dili. Sesta (06/08).

Sorumutu ho Autoridade Munisipál Ainaro ne’e hodi estabelese koordenasaun ne’ebé di’ak hodi melloria efetivamente sistema komunikasaun ne’ebé lais liu iha nivel tékniku no ho autoridade sira, nune’e mós iha komitmentu atu bele fornese dadus no informasaun ba autoridade munisipál kona-ba projetu konstrusaun en jerál, projetu foun, on-going, no transferénsia públika. 

Alein ko’alia kona-ba hametin liña koordenasaun, Diretór Ezekutivu ADN mós husu Autoridade Munisipál atu hamutuk ho Tékniku ADN sira iha munisipiu hodi tau matan ka kontrola lisuk projetu konstrusaun sira ne’ebé implementa husi kompañia no donos projetu sira iha tereñu, nune’e bele garante di’ak liu tan nia kualidade.