ADN, IP, Dili 26 Jullu 2021

    Diretór Ezekutivu Ajénsia Dezenvolvimentu Nasionál Institutu Públiku, (ADN,IP) Eng. Mariano Renato M. da Cruz hala’o enkontru ho Ministru Edukasaun Juventude no Desportu, Sr. Armindo Maya hodi deskute kona-ba Implementasaun ba Programa Konstrusaun no Rehabilitasaun Infraestrutura Edukativa husi MEJD nian ba tinan 2021 ne’ebé finansia husi fundu transferénsia públika.

    Enkontru ne’ebé hala’o durante oras rua resin iha edifisiu MEJD, Tuana Laran, kinta loron 26 fulan jullu ne’e, parte ADN presiza iha klarifikasaun no justifikasaun tékniku balun em relasaun ho natureza implementasaun, supervizaun, pagamentu, no oinsá bele garante nia kualidade ba projetu konstrusaun refere ne’ebé sei implementa no partisipa direta husi komunidade (inan-aman) sira.

    Inisitaiva sorumutu entre parte rua, Diretór Ezekutivu ADN nian hateten, parte dono projetu presiza tau engeneiru esensiál sira iha tereñu hodi esplika ba badaen/tukang sira kona-ba dokumentus tékniku konstrusaun nian, prinsipalmente ba dokumentus BoQ, Dezeñu no Espesifikasaun sira.

Alein ne’e, husu atu presiza fó prioridade liu hodi halo supervizaun diariamente ba obra konstrusaun sira hodi bele fó garante ba Estadu katak, obra sira implemta husi komunidade ne’e sei bele garantia nia kualidade ne’ebé di’ak.

    Iha okaziaun ne’e, parte ADN nian mós husu dono projetu (MEJD) nian atu partilla informasaun sira kona-ba projetu sira ne’ebé abandona ka liu ona data kontratu husi tinan 5, ne’ebé presiza atu buka solusaun hodi deside status projetu nian ba oin.

Tuir dadus projetu Ministériu Edukasaun ne’ebé submete ba ADN iha tinan 2021 hamutuk totál projetu 225 kompostu husi projetu Fundu Infraetrutura, Liña Ministeriál, Transferensia Públika. Husi totál projetu refere 215 mak ADN verifika ona, no dadaun ne’e dokumentu 10 mak ADN verifika hela. Nune’e, espesifikamente, dadus projetu konstrusaun infraestrutura edukativa ne’ebé finansia husi fundus transferénsia públika ne’e hamutuk totál projetu 193.

    Entertantu, sorumutu ne’e hetan mós partisipasaun husi Kordenadora Unidade Avaliasaun Projetu Eng. Melenia Barros da Costa, Kordenadora Unidade Kontrolu no Validasaun Kualidade Eng. Emerenciana da Costa M. Freitas, no Tékniku Baze Dadus Eng. Susana Sinala D.R.A.