Dili, 13/08/2025. Reuniaun KRO ne’ebé maka Prezide husi Primeiru Ministru RDTL S.E Kay Rala Xanana Gusmão ne’ebé maka partisipa mós husi Vise-PM, Ministru Koordenadór Asuntus Ekonómikus no Ministru Turismu no Ambiente S.E Fransisco Kalbuadi Lay, Vise-PM, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, S.E Mariano Assanami Sabino, Ministra Finansas S.E Santina José Rodrigues Viegas Cardoso, Ministru Obras Públikas S.E Samuel Marçal, Ministru Planeamentu Investimentu no Estratéjiku S.E Gastão Fransisco de Sousa no mós Vise-Ministra Finansas S.E Felicia Claudinanda Cruz Carvalho, tama ona ba loron da-hitu (7). Reuniaun ida ne’e kontinua hola fatin iha Sala Auditorium, Ministériu Finansas nian iha Aitarak laran Dili.

Iha reuniaun KRO ida ne’e, Ajénsia Dezenvolvimentu Nasionál (ADN) liu husi nia Diretór Ezekutivu Interiñu Eng. Januario M. Guterres kontinua hola parte, Prezensa Diretór Ezekutivu Interiñu ADN nian iha reuniaun KRO ida ne’e ho kualidade núdar observadór.

Reuniaun KRO ba loron da-hitu ida ne’e, Ministériu rua maka halo ona aprezentasaun ba sira nia proposta orsamentu inklui simu ona tetu orsamentu tinan fiskál husi Ministériu Finansas. Ministeriu rua ne’e maka hanesan Prezidensia Konsellu Ministrus hamutuk ho Instituisaun sira ne’ebé maka tutela ba no Ministériu Administrasaun ESTATAL hamutuk ho Instituisaun sira ne’ebé maka tutela ba Ministériu ida ne’e.

Iha reuniaun ida ne’e, Ministériu Finansas intrega ba iha Prezidensia Konsellu Ministrus tetu orsamentu tinan fiskál 2026 hamutuk US$ 8,125,030 ne’ebé maka fahe ba kategoria sira maka hanesan Salariu ho Vensimentu US$3,822,664, Bens no Servisu Korrentes US$3,301,366 no Transferensias Públikas US$1,001,000.

Instituisaun sira ne’ebé tutela direta bá Prezidénsia Konsellu Ministrus mak hanesan, Arquivu no Muzéu Rezisténsia Timorense (AMRT), Centro Nacional Chegal IP (CHEGA.IP), Imprensa Nasionál Timor Leste, I.P, Inspesaun-Jerál Estadu (IJE) no TATOLI-Agência Noticiosa de Timor-Leste, IP.

Hafoin termina ho Prezidensia Konsellu Ministrus, kontinua hikas ho Ministériu Administrasaun Estatal (MAE) hamutuk ho Instituisaun tutelada sira no iha oportunidade ne’e simu mós Tetu Orsamentu tinan 2026 husi Ministériu Finansas (MF) hamutuk $14,511,715.

Montante ne’e fahe bá Saláriu no Vensimentu $3,547,730, Bens no Servisu Korrentes $8,760,280 no Transferênsia Públika $2,203,705.

Instituisaun Tutelada sira mak hanesan Sekretariadu Tékniku Administrasaun Estatál (STAE), Fundu Espesiál Dezenvolvimentu Ataúro (FEDA), Arkivu Nasionál Timor-Leste (ANTL) no Institutu Nasionál Administrasaun Públika (INAP).

Reuniaun KRO ne’e sei kontinua hala’o to’o Ministériu no Instituisaun sira halo hotu ona aprezentasaun no simu hotu ona Tetu Orsamentu tinan 2026 husi Ministériu Finansas (MF) tuir Kalendáriu mak iha, reuniaun Komité Revizaun Orsamentu 2026 sei remata iha sábadu (23/08/2025).