Dili, 15/08/2025. Atu avalia dezempeñu servisu husi tékniku sira tantu iha nasionál no iha munisipiu hodi hala’o sira nia knaar, nune’e mós atu planeia atividade sira iha futuru ne’ebé sei hala’o iha futuru mai ho responsabilidade, transparante no ho susesu no atu atinji objetivu komún ida ho konkordánsia husi parte ida-idak atu nune'e bele hetan armonia no ekilíbriu.

Ho nune’e maka Diretór Ezekutivu Interiñu ADN Eng. Januario M. Guteres realiza enkontru ho tékniku sira husi Laboratóriu ADN, Tékniku ADN Nasionál no mós sira ne’ebé destakadu iha munisipiu sira hotu iha teritoriu Timor-Leste laran.

Iha enkontru ne’e, Diretór Ezekutivu Interiñu ADN ko'alia liu kona-ba problema pagamentu sira no iha oportunidade ne'e fo mós orientasaun ba tékniku sira atu nune'e kuandu iha tereñu halo monitorizasaun maka identifika projetu ruma ne’ebé maka abandonadu ka projetu balu ne'ebé maka kontinua la'o hela maibé la'o tarde,entaun buka hatene ninia motivu ka razaun sa-ida maka halo abandonadu, ka la'o tarde, no solusaun sa-ida maka atu foti relasiona ho asuntu ne’e.

Enkontru ida ne’e importante tebes hodi nune’e ekipa hotu-hotu atu komprende objetivu komún sira no aliña sira nia planu servisu ida-idak, atu nune'e esforsu hotu-hotu foka ba atinjimentu objetivu ne'ebé hanesan.

Liu husi enkontru ida ne’e maka bele forma objetivu no misaun ida de'it atu nune'e ba oin bele servisu hamutuk hodi atinji objetivu ne'e ho di’ak liu tan. (Media_ADN)