Raeoa, 24/07/2024. ADN marka hikas nia prezensa iha RAEOA bazea ba komprimisu husi Primeiru Ministru (PM) ba Autoridade Foun RAEOA nian, ne’ebé maka dehan katak Governu Sentral Prontu fó apoiu saida deit ba autoridade RAEOA hodi hala’o sira nia kna’ar ho diak, hodi kontribui ba dezenvolvimentu Timor-leste.

Intervensaun ADN, I.P. nian iha RAEOA, liu-liu kona-ba apoiu teknika ba area infraestrutura nian. Tanba ADN, I.P. nia funsaun maka halo monitorizasaun, avaliasaun ba kualidade infraestrutura no halo sertifikasaun ba progresu implementasaun fiziku husi projetu infraestrutura nian hodi Ministeriu Finansas ka Autoridade RAEOA bele selu projetu sira.

Dadaun ne’e, ADN, I.P. instala hikas fali ona nia edifisiu no hala’o ona nia serbisu iha RAEOA no serbisu direitamente iha gabinete PA (Prezidente Autoridade) inklui ho   DRI (Diresaun Rejionál Infraestrutura) no mos UJP (Unidade Jestaun Projetu) RAEOA nian.Área servisu ADN ho Autoridade RAEOA maka  hanesan ; Halo verifikasaun no inspesaun ba prosesu  pagamentu ba projetu sira, Kria baze dedadus  ka back data ba projetu sira. Aliened ne’e apoiu mós DRI hodi halo monitorizasaun no avaliasaun ba kualidade projetu sira, Halo verifikasaun no validasaun ba prontidaun projetu ba atu halo tenderizasaun, apoiu mós iha parte laboratoriu, liu-liu ba sira nia xefi no téknika laboratoriu sira atu halo serbisu tuir padraun esfesifikasaun sira ne’ebé maka vigora iha kategoria konstrusaun idak-idak nian.  ADN apoiu mós Unidade Jestaun Projetu, liu-liu ba projetu boot sira ne’ebé maka iha  FIDIC (Fédération Internationale Des Ingénieurs-Conseils/ Federação Internacional de Engenheiros Consultores) nia mahon.

Rezultadu serbisu hamutuk entre ADN,I.P. no autoridade RAEOA maka  hanesan konsege Identifika katak baze dadus ba projetu 183  la iha, tanba autoridade RAEOA sesante la entrega dadus kona-ba projetu 183 ba autoridade foun. Nune’e hamosu difikuldade ba autoridade foun atu halo prosesu pagamentu ba projetu sira, tanba lahatene loos persentazen hira maka Autoridade  RAEOA sesante selu tiha ona ba  projetu 183 idak-idak nian.

Verifika kualidade projetu, liu-liu projetu Estrada nian. Kona-ba estandarizasaun ba estrada ne’ebé maka tau alkatraun nia prosesu ne’e iha faze haat, maka hanesan: (1). material embazementu, (2). Sub-baze, (3). base course, (4). Nahe alkatraun.

Iha prosesu verifikasaun ba projetu estrada: Pakote I : hosi Noefefan ba Oénunu no Estrada Pakote II: hosi Tono ba toò Oésilio neèbé maka nia implementasaun fiziku la tuir kontratu (BoQ)  ka sei falta base course, karik kazu neè mosu tanba dezde inisiu projetu sira neè halao ADN,I.P. la invole iha laran?

Estrada Pakote I, hosi Ponte Noefefan ba toò Oénunu kilometru 11.67 km no orsamentu ba projetu neè osan dolar miliaun $ 22; kada kilometru 1 nia kustu media neè: ho osan dolar miliaun $ 1.8. Estrada neè nia hatur faduk dahuluk iha loron 19 Agostu  2022. Estrada neè nia implementasaun fiziku toò ona porsentu: 55% no osan neèbé autoridade RAEOA sesante selu tiha ona ba Kompañia Waskita Karya (WK) neè porsentu: 54 %  no ekuivalente ho osan miliaun $ 10.

Maibé hafoin verifikasaun no analiza iha laboratoriu hosi  ADN,I.P. no DRI RAEOA nian katak estrada neè nia kilometru 6, maka Kompañia Waskita Karya (WK) utiliza  agergadu/ fatuk dulas ho makina neè porsentu  30% deit no porsentu 70 % sira uza fali deit raihenek. Tuir lolos neè material uza ba base course neè porsentu 100% neè hosi fatuk sira neèbé maka makina dulas neè, laos raihenek. Tanba neè, maka iha loron 29 Maiu 2024 neè ADN,I.P. no DRI RAEOA rekomenda ba Kompañia Waskita Karya (WK) atu sobu tiha Estrada kilometru 6 neè no Kompañia Waskita Karya (WK) mos konkorda ho rekomendasaun neè . Neè duni maka, iha loron 22 Jullu 2024 neè , akompaña hosi Ministru MPIE (Ministeriu Planiamentu no Investimentu Estratejiku), Señor Enj.Gastão Francisco de Sousa hamutuk ho ADN,I.P. no DRI RAEOA asiste Kompañia Waskita Karya (WK) neèbé maka sobu tiha estrada kilometru 6 neèbé maka sedauk nahe alkatraun. Hafoin maka Kompañia Waskita Karya (WK) kontinua halo fila fali estrada neè tau nia base course ho fatuk neèbé maka dulas ho makina neè.

Estrada Pakote II, hosi Tono ba toò Oésilio kilometru 16.7 km no orsamentu ba projetu neè dolar miliaun $ 33; kada kilometru 1 nia kustu media neè: ho osan dolar miliaun $ 1.8.  Estrada neè nia hatur faduk dahuluk iha loron 16 Maiu 2023. Estrada neè nia implementasaun fiziku toò ona porsentu: 23% no Autoridade RAEOA sedauk bele selu osan ba Kompañia Waskita Karya (WK) , tanba PA RAEOA konsidera valor orsamentu hosi projetu neè sei aas loos; tanba ne`e maka PA  husu ba  ADN,I.P. no DRI RAEOA nian ba halo fali negosiasaun ho Kompañia Waskita Karya (WK).

Estrada neè mos iha nia iregularidade hanesan mos ho estrada pakote I nian neè, katak falta base course. Tanba neè maka iha loron 22 Jullu 2024 neè , akompaña hosi Ministru MPIE (Ministeriu Planiamentu no Investimentu Estratejiku), Señor Enj.Gastáo Francisco de Sousa hamutuk ho ADN,I.P. no DRI RAEOA asiste Kompañia Waskita Karya (WK) neèbé maka sobu tiha estrada kilometru 3.5 neèbé maka nahe tiha ona alkatraun. Hafoin maka Kompañia Waskita Karya (WK) kontinua halo fila fali estrada neè tau nia base course ho fatuk neèbé maka dulas ho makina neè, laos ho raihenek.

Ba oin ita hotu hein katak serbisu hamutuk entre ADN,I.P.  ho Autoridade RAEOA, liu-liu iha area infraestrutura nian sei lao diak nafatin atu nu ne’e la bele mosu tan kazu sobu konstrusaun hanesan iha estrada sira neèbe hosi Ponte Noefefan ba toò Oénunu no hosi Tono ba toò iha Oésilio neè.