DIRETÓR EZEKUTIVU ADN PARTISIPA LANSAMENTU FATUK DAHULUK BA REABILITASAUN ESTRADA POSTU ADMINISTRATIVU LAKLO

Manatuto, 16 Juñu 2023 - Diretór Ezekutivu Ajénsia Dezenvolvimentu Nasionál Institutu Públiku (ADN, I.P.) Eng. Mariano Renato Monteiro da Cruz, akompaña Ministru Obras Públikas (MOP), Eng. Abel Pires da Silva, hamutuk ho Administradór munisípiu Manatuto, Bernardo Lopes, Administradór Postu

Administrativu Laklo hala’o lansamentu ba projetu reabilitasaun estrada postu administrativu Laklo ne’ebé hala’o iha aldeia Obratu, suku Sau, postu administrativu Manatuto vila, munisípiu Manatuto.

Ministru Obras Públika iha nia intervensaun husu ba komunidade munisípiu ne’e nian no parte hotu-hotu atu iha kolaborasaun no fó apoiu másimu ba responsavel ba projetu ne’e atu bele finaliza obra tuir kontratu ne’ebé determina ona. 

Ministru Obras Públikas apresia no agradese ba kontribuisaun husi parte hotu-hotu espesialmente ekipa tékniku Ministériu Obras Públikas nian, husi Ajénsia Dezenvolvimentu Nasionál, Institutu Públiku (ADN, I.P) ba verifikasaun projetu refere no Autoridade Nasionál Lisensiamentu Ambientál (ANLA).

Projetu konstrusaun ba reabilitasaun ne’e, responsabiliza husi kompañia/kontratór Jova Construcção Unipessoal Lda in JV With PT. Wijaya Karya (Persero) Tbk., Representação Permanente ho ninia durasaun fulan 18 (sanulu resin ualu) no períodu Retensaun tinan 1 (ida).

Dono do Projeto ba obra ne’e mak husi MOP rasik ho finansimentu husi Fundu Infraetrutura ninian ne’ebé ho montante USD 6,507,608.11.

Naran ba projetu ne’e mak Roard Rehabilitation of “Municipal Roads” Laclo to Laclo Town STA. 0+000 to STA. 18+500, Lot 1: Section 1 (Manatuto-Laclo 13.672 Km).