DIRETÓR EZEKUTIVU ADN, IP HO ADJUNTU HALA’O ENKONTRU HO PREZIDENTE ANETL NO EKIPA

Loron-kinta, 20 Janeiru 2022: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz akompaña husi adjuntu Eng. Januario Maia Guterres ho Koordenadora Unidade Estudu Dezenvolvimentu Kompeténsia (UEDC sigla portugés) Arq. Valentina V. C. Bianco hamutuk ho tékniku sira hala´o enkontru ho Prezidente Asosiasaun Nasionál Enjeñeiru Timor-Leste (ANETL) Eng. Armando de Almeida, ho nia membru sira iha sala reuniaun MPO/ADN.

Sorumutu ne’ebé lidera husi Diretór Ezekutivu ADN, IP hatete, realizasaun ba enkontru refere tanba simu orientasaun husi Vise Primeiru no Ministru Planu Ordenamentu atu ADN, IP bele haree mekanizmu oinsa mak bele halo kooperasaun servisu ho ANETL ne´ebé etabelese iha 2012, hodi mellora servisu asosiasaun nian, nune´e fó dadus ba governu atu asegura prosesu dezenvomentu infra-estrutura iha Timor-Leste ba futuru.

Diskusaun espesífiku ba enkontru formál dahuluk entre ADN no ANETL ne´e haree kona-ba ezisténsia asosiasaun, misaun no vizaun oinsa mak bele reforsa atu sai hanesan institutu não governamentál ida ne´ebé bele hetan ninia legalidade iha Diresaun Jerál Servisu Rejistus no Notariadu, Mintériu Justisa atu iha futuru ANETL bele hala´a nia knar ho di´ak.

Nune´e Prezidente ANETL, Eng. Armando de Almeida mós aprezenta kona-ba papel ANETL nian mak hanesan, prepara asosiasaun sai hanesan sentru ida hodi organiza no fó kapasitasaun ba enjeñeiru timoroan sira, halo parseria ho governu liu-liu koopera ho ministériu balun inklui mós ajénsia sira atu bele estabelese kuríkulu ida ne´ebé liga ho interese enjeñeiru sira nian.

Tanba ne’e, bazeia ba papel servisu husi parte rua nian entre ADN no ANETL ne´ebé interligadu, sei halo akordu ida hodi halao´ servisu hamutuk atu haree kona-ba kapasitasaun ba enjeñeiru sira.

Enkontru ne´e hanesan parte preliminár maibé tuir planu iha tempu oin mai parte rua sei hasoru malu fali hodi diskuti kle´an liután kona-ba planu asaun asosiasaun nian.

Mídia ADN