ADN, IP HALA´O AUDIÉNSIA PÚBLIKA INISIÁL HO KOMISAUN E PARLAMENTU NASIONÁL KONA-BA PROPOSTA LEI OJE 2022

Loron-kinta, 11 Novembru 2021: Diretór Ezekutivu Ajénsia Dezenvolvimentu Nasionál, Institutu Públiku (ADN, IP) Eng. Mariano Renato Monteiro da Cruz akompaña husi Adjunto Diretór Eng. Januario M. Guterres, asesór nasionál no Koordenadór sira husi kada unidade hala´o Audiénsia Públika Inisiál ho Komisaun E Parlamentu Nasionál ne´ebé lidera husi Vise-Prezidente Komisaun E Deputado Favião de Oliveira, ba Proposta Lei nº35/V/(4ª) kona-ba Orsamentu Jerál Estadu (OJE) 2022, iha Residencia Oficial Presidente Parlamento Nacional Farol, Díli.

Iha aprezentasaun Diretór Ezekutivu ADN, IP halo sumáriu rezultadu ezekusaun OJE 2021 nomós Proposta ba OJE inklui aprezenta kondisaun atuál ADN, IP nian.

Orsamentu 2021 ne´ebé aloka ba ADN, IP totál $8,436,545.00 kompostu husi programa 5 ho ninia rezultadu ezekusaun ba kada programa hanesan: Garante Kualidade Implementasaun no Ezekusaun Projetu sira, 70%; Implementasaun Polítika Jéneru, 73%; Boa Governasaun no Jestaun Institusionál 40% Planeamentu Dezenvolvimentu Integradu Munisipál (PDIM) 34%; Implementasaun projetu husi liña ministeriál sira ne´ebé hetan kontrolu direta husi ADN, IP 45%. Ho nune´e totál ezekusaun OJE 2021 ba ADN, IP hahú husu 1 Janeiru to´o 10 Novembru 2021 atinje ona porsentu 46% no ADN mós halo kalkulasaun ba porsentu estimadu ezekusaun OJE ba instituisaun refere até fulan-Dezembru 2021 bele atinje to´o 74.50%.

Entretantu iha biban hanesan ADN propoen OJE 2022 ho totál $ 4,993,240 ne’ebe fahe ba kategoria 3 hanesan: Bens & Servisu, Kapitál Menor      no Kapitál Dezenvolvimentu nomós fahe ba programa prioriedade 5 hanesan: Dezenvolvimentu Rurál no Urbanu, Boa Governasaun no Jestaun Institusionál, Saúde, Edukasaun no Formasaun, no Igualdade Jéneru no Inkluzaun Sosiál.

Husi ADN nia aprezentasaun deputadu sira fó apresisaun ba Diretór Ezekutivu ho nia ekipa no insentiva nafatin institutu refere atu kontinua hala´o knar importante ne´e hodi halo kontrolu ba projetu infra-estrutura no garante kualidade iha terrióriu tomak.

Iha audiénsia públika ohin, inklui mós husi Ajénsia Tecnologia da Informação e Comunicação (TIC) TIMOR I.P., Instituto de Gestão de Equipamentos (IGE) no Programa Nacional de Desenvolvimento dos Sucos (PNDS).

Bazei ba kalendáriu Audiénsia Públika Parlamentu Nasionál sei kontinua hikas ba loron-segunda, 15 Novembru 2021 hamutuk ho Ministériu tolu hanesan, Ministériu Planu no Ordenamentu, Ministériu Obras Públika no Ministériu Transporte no Komunikasaun.

Mídia ADN