DG-A.D.N, hamutuk ho nia Ekipa akompanha Asina kontratu Grupu Komunitaria  Municipiu Dili, iha Salaun Inkontru Municipiu Dili, Dia 15 de Junhu de 2015.

Ekipa A.D.N kompostu husi, DG-A.D.N Sr. Samuel Marçal, Adjuntu-DG Sr.  Alexandre Sarmento, Assesoria Sra. Cipriana Teresa Tita de Jesus e Sousa, Assesor Sr. Herdade Boavida dos Santos inklui Enjineiru A.D.N Municipiu Dili.

Adjuntu-DG, iha nia diskursu hateten katak, programa KTI komesa hahu iha 2014, halao iha Municipiu sanulu resin tolu, maibe agora hala’o deit iha Municipiu sanulu resin rua tamba Oe’cusse tama ona iha Zona Espesial, nebe progarama KTI la hala’o ona iha neba.

“Programa ida ne’e atu hadiak ita nia patrimonia komunitaria, husi setor Saude no Edukasaun nebe mak a’at ona, tamba ne’e asset kominadade nia, neduni objetivu husi programa ne’e mak hakerek ona iha mata-dalan, primeiru mak ita hakarak hadiak fila-fali Eskola, Klinika ou Sentru Saude sira nebe mak nia kondisaun a’at ona.” Dehan Ajuntu-DG

Adjuntu-DG hatutan katak, liu husi programa KTI ita bele kria padraun social katak, hametin paz no unidade iha komunidadenia le’et, nune’e mos Adjuntu-DG husu ba Grupu Komunitaria sira atu banati ukun-fuan tolu mak hanesan, Kualidade, Tuir Tempu nebe determina no Tuir kustu.

Aleinde ne’e, DG-A.D.N husu ba Grupu Komunitaria sira, atu aproveita hodi aprende didiak oinsa hada fatuk ho didiak, no oinsa halo odamatan ka Janela nebe diak, hodi nune’e ita labele depende de’it badain sira husi rai liur.

Nune’e mos Administrador Municipiu Dili Sr. Gaspar Soares, husu ba Grupu Komunitaria sira nebe Governu fo Konfiansa atu servisu ho responsabilidade, tamba iha projetu KTI balu nebe implementa iha Tinan kotuk ladauk finaliza.

“Hau husu ba Grupu Komunitaria nebe ohin asina kontratu ona, hatudu imi nia kualidade servisu, hodi nune’e governu bele tau fiar ba imi katak imi mos bele.”Dehan Administrador.

Administrador mos fo hanoin nafatin ba Grupu Komunitaria sira atu labele repete fila-fali failansu nebe akontese ona iha tinan kotuk.

*(Média-A.D.N)*