Adjunto-DG A.D.N Sr. Alexandre Sarmento hamutuk ho nia Ekipa husi Edukasaun, Saude nomos reprezentante ESTATAL, inklui Tékniku A.D.N, akompanha asinha kontratu grupu KTI iha Municipiu Liquiça, Dia 25, de Maiu 2015.
Programa KTI ou Programa Rehablitasaun Patrimonia Komunitaria, hahu hala’o iha tinan 2014, hodi rehablita fila-fali eskola no sentru saude nebe a’at, maibe iha eskola barak no Sentru Saude balun ladauk halo rehablitasaun, tamba ne’e programa KTI kontinua hala’o iha tinan ne’e
Iha okaziaun ne’e Diretor Edukasaun Municipiu Liquiça Sr. Laurentinho informa katak, iha tinan fizkal 2015, Municipiu Liquiça iha projetu 26 maibe projetu nebe tama iha kategoria rehablitasaun iha 9 de’it.
“Iha tinan ne’e Municipiu Liquiça haruka lista projetu hamutuk 26, maibe Projetu 9 deit mak tama iha lista ho rajaun tamba orsamentu ba tinan ne’e fahe ba mai la to’o, ne’e duni iha postu 3, kada postu hetan projtu 3, Liquiça 3, Bazartete 3, no Maubara 3.”Dehan Sr. Laurentinho.
Nune’e mos Diretor Saude Municipiu Liquiça informa katak, Projetu rehablitasaun ba Sentru Saude iha projetu 5.
Entertantu Adjuntu-DG Sr. Alexandre Sarmento, hateten ba Membru KTI sira katak programa rehablitasaun ne’e iha objetivu fundamental mak hadiak fila-fali patrimonia komunitaria hanesan iha setor Saude no Edukasaun, hodi nune’e bele hetan benefisiu ne’ebe diak ba ita-an rasik,
“Rehablitasaun Patrimonia du Estadu ne’e iha objetivu 3 de’it, primeiru ita hakarak hadiak fila-fali ita nia patrimonia komunitaria iha setor Saude no Edukasaun nebe hetan estragus, segundu atu fo insentivu finanseira ba komunidade rasik, tamba ita lakohi obra ki’ik oan hanesan ne’e kompanha mak kaer; ami husu ba komunidade sira nebe mak kaer obra ne’e tengki ho responsablidade, terseiru atu hametin korezaun social hanesan talin ida kesi ita hamutuk nudar grupu komunitaria hodi bele metin liu tan.”Dehan Adjuntu-DG
Adjuntu-DG ejize ba membru KTI sira halo obra ne’e ho kualidade, tamba ne’e wainhira tekniku sira haruka troka buat balun nebe la lo’os tenki troka, nune’e bele garantia kualidade obra nebe ita konstrui.
*(Média-A.D.N)*
