Sua Excelencia Primeiru Ministru Kay Rala Xanana Gusmão fo instrusaun ba Ajensia de Dezenvolvimentu Nasional (A.D.N) hodi prepara Padraun Konstrusaun Sivil iha Timor Leste tamba ne’e A.D.N realiza sorumotuk ho tekniku sira husi Linha Ministerial iha Salaun Inkontru A.D.N, loron 01 de Setembru 2014.
Objectivu husi sorumotuk ne’e, atu tetu no deskuti hamutuk ho tekniku sira husi Linha Ministerial konaba padraun Konstrusaun Sivil nebe prepara ona husi A.D.N antes halo Seminariu Nasional.
DG-A.D.N Sr. Samuel Marçal iha nia intervensaun hateten katak, A.D.N simu ideas no opiniaun husi linha ministerial hodi establese padraun konstrusaun Sivil
“ohin ami bolu maluk sira mai iha ne’e atu deskuti hamutuk, konaba padraun konstrusaun sivil nebe ami prepara ona iha ne’e,liu-liu maluk tekniku sira husi Obras publik nebe iha esperiensia barak liu, atu ita bele halo diskusaun hamutuk karik maluk sira iha ideias ruma atu aumenta nomos iha buat balu karik persija muda ita muda, tamba materia nebe ami prepara iha ne’e hanesan draft de’it, importnte liu mak akordu hamutuk hodi fo kontribuisaun ida ba Guvernu”Dehan DG-A.D.N
DG-A.D.N hatutan katak, padraun konstrusaun Sivil nebe mak perpara husi A.D.N hare liu ba iha area infra-estrutura hanesan, ponte, estaradas, irigasaun, nomos edifisius tamba tinan ida ne’e Governo tau osan barak ba iha area refere.
Nune’e mos Adjuntu-DG. Sr. Alexandre Sarmento hateten tan katak, A.D.N bolu linha Ministerial sira hodi halo diskusaun konaba padraun konstrusaun sivil ne’e tamba A.D.N lakoi hakat liu Ministériu sira
“Ami hakarak konvida hotu Ministru sira mai halo diskusaun iha ne’e, tamba ami lakoi hakat liu Ministru sira, tamba ita bo’ot sira nia kontribuisaun ne’e important tebes ba ami” dehan Adjuntu.
Entertantu Diretor Jeral Obras Publik Sr. José Mestre hato’o, Ministru Obras Publik fo nia apoiu tomak ba A.D.N tamba ho inisiativu tomak halo padraun kostrusaun sivil, tuir Sr. Mestre katak ida ne’e pasa parte ida buka ona solusaun ba spesifikasaun teknika.
“wainhira iha ona padraun konstrusaun civil, hau fiar katak bele hamenus ona problema iha ita nia rai”.Dehan DG-Obras Publiku.
DG-Obras Publiku husu partisipante sira nebe partisipa iha sorumutuk ne’e atu fo kontribuisaun no hadiak hamutuk karik iha failansu ruma, hodi nune’e material hirak ne’e pronto ona wainhira tama ba iha seminariu nasional.
Tuir planu Seminariu Nasional konaba Standarizasaun ba Padraun Kustu Material ne’e sei hala’o iha fulan Setembru ne’e nia laran
*Média A.D.N*
